भिवंडी : ठाण्याच्या भिवंडी तालुक्यातील कोशिंबी केंद्रातील डोहोळेपाडा येथील जिल्हा परिषदेच्या शाळेत डॉ. ए. पी. जे. अब्दुल कलाम यांच्या ८८व्या जयंतीनिमित्त वाचन प्रेरणा दिन साजरा करण्यात आला.
कार्यक्रमाच्या अध्यक्षस्थानी शाळा व्यवस्थापन समिती अध्यक्ष अशोक म्हसकर होते. डॉ. ए. पी. जे. अब्दुल कलाम यांच्या प्रतिमेला म्हसकर, डोहोळे ग्रामपंचायत सदस्या मंजुळा वाघे, मंजुळा फापे, मुख्याध्यापक जगदीश जाधव, सहशिक्षक अशोक गायकवाड यांनी पुष्पहार अर्पण केला. डॉ. कलाम यांच्या जीवनकार्यावर सहशिक्षक अशोक गायकवाड यांनी प्रबोधन केले. उपस्थित मान्यवरांनी, शिक्षकांनी व विद्यार्थ्यांनी शाळेत उपलब्ध असलेली विविध महापुरुषांची, शास्त्रज्ञांची, कथांची पुस्तके एक तास वाचली.
१५ ऑक्टोबर रोजी जागतिक हात धुवा दिनही होता. त्या निमित्तानेही विशेष कार्यक्रमाचे आयोजन करण्यात आले होते. विद्यार्थ्यांना दैनंदिन जीवनात हात साबणाने धुवायची सवय लागावी व आरोग्य चांगले राहावे यासाठी प्रबोधन करण्यात आले.
आभारप्रदर्शन मुख्याध्यापक जगदीश जाधव यांनी केले.
